158 ـ لېوه او سپی

source of image: http://aesop-fables.co.uk/files/aesop-images/aesop-fables-58.png

 يو  سړي  يو  قوي  او  چاغ  سپی  درلود .  د  دې  لپاره  چي  له  يوې  خوا  يې  سپی  خروړئ   شي  او  له  بلي  خوا  د  ورځي  څوک  و  نه  داړي  نو  هغه  به  يې  په  پنډ  او  کلک پړي  يا  ځنځير  په  يوه  ځای  کښي  و  تاړه .

 يوه  ورځ  پر  سپي  باندي  يو  لېوه  چي  د  ډېر  ډنګروالي  يې  د  بدن  هډوکي  ښکارېده  راغئ  او  ورته  و  يې  ويل : ”  ملګريه !  ډېر  وږئ   يم .  په  شپو  او  حتا  په  هفتو  څه  شی  نه  شم  موندلای .  ژوند  مي  ډېر  تريخ  دئ .  له  ډېر  ډنګروالي  مي  هډوکي  له  ليري  ښکاري .  نه  پوهېږم  چي  څه  چاره  و  کړم  او  چېرته  ولاړ  شم ”؟

سپي  ورته  وويل : ”  چاره  يې  ډېره  اسانه  ده .  راځه  زما  په  شان  وظيفه  و  نيسه.» 

لېوه  ورته  وويل : ”  ستا  وظيفه  څه  شی  ده ”؟  سپي  وويل : ” زما  وظيفه  دا ده  چي  د  څښتن  کور  مي  ساتم  تر  څو  غله  ور  ته  را  نه  شي .  نو  زما  څښتن  د  دې  کار  په  سبب  ښه  ښه  خواړه  او  ښې  ښې  غوښي  را  کوي.»  لېوه  وويل : ” دا  خو  ډېر  ساده  او  اسانه  کار  دئ .

  نو  هيله  کوم  چي  داسي  وظيفه  ماته  هم  پيدا  کړې.»  د  خبرو  په  ترڅ  کي   نا  څاپه  د  لېوه  سترګي  پر  يوه  ټپ  و  لګېدې  چي  د  سپي  په  غاړه  کي  يې  و  ليدئ .  نو  له  سپي  څخه  يې  د  هغه  ټپ   په  باره  کي  پوښتنه  وکړه .

سپي  وويل : ”  دا  د  ځنځير  او  پړي  ټپ  دئ .  ځکه  خاوند  مي  د ورځي  له  خوا  په  ځنځير  يا  پړي  تړي  تر  څو  خلک  و  نه  داړم  او  د  شپې  له  خوا  مي  خوشي  کوي  چي  د  کور  پاملرنه  و  کړم.»

لېوه  ورته  وويل : ”  د  اسارت  او  مريتوب  ژوند  مي  خوښ  نه  دئ  او  نه  غواړم  چي  په  داسي  ذلت  او  بند  کي  ژوند  وکړم .  ځکه  د  ازادۍ  ژوند  ډېر  خوندور  ژوند  دئ .  که  څه  هم  انسان  پکښي  په  لوږه  اخته  وي.»
 

 ترتيب کوونکی :  عبدالعلي رسولزاده

منبع: www.pashto.se ، د ۲۰۱۷ کال د فبرورۍ لومړۍ نېټه

 د کاپي کولو په صورت کي د منبع او د بشپړ لينک زیاتول حتمي دي.

**************************************************

هيله: لطفا د ماشومانو لپاره په نکلونو او اشعار رالېږلو سره زموږ د دغې پروژې سره مرسته وکړئ. که غواړئ زموږ سره تماس ونيسئ نو پر دغه جمله کليک وکړئ.