150 ـ زمری او غويی

source of image: http://img14.deviantart.net/ad62/i/2012/317/4/a/bull__amp__lion_base_by_selenaede-d5kxmhd.png

 

 په  يوه  ځنګله  کي  يوه  ډېر  زاړه  زمري  ژوند  کاوه  چي  د  ډيري  کمزورۍ  او  زهير والي  څخه  په  ښکار  پسې  نه  سوای   وتلای .  په  ورځو  او  په  شپو  به  وږئ  وو .  دغه  ځنګله  ته  نژدې  يو  ډېر  چاغ  غويی  هره  ورځ  د  څړ  د  پاره  راوتئ  .  زمري  دا  چاره  و  سنجول  چي  دغه  غويی  به  د  مېلمستيا  په  بانه ( پلمه )  را  وغواړي  او  غوښي  به  يې  وخوري .  د  دې  د  پاره  يې  ګيدړه  ور  ولېږل  او  ورته  ويې  ويل  چي  زمري  تا  ته  سلام  وايه  او  پسله  سلامه  يې  تاته  بلنه  درکړې  ده  چي  د  غرمې  د  ډوډۍ  د  خوړلو  د  پاره  و  ځنګله  ته  راسې  چي  هلته  يې  ستا  د  مېلمستيا  د  پاره  ښه  خواږه  واښه  بربر  کړي  دي  او  د  ځان  د  پاره  يې  د  وري  غوښي  پخې  کړي   دي . 

غوايي  هم  د  زمري  مېلمستيا  په  خوښي  سره  و  منل  او  د  ځنګله  پر  لور  رهي  سو .  کله  چي  د  زمري  کور  ته  را  نژدې  سو، ګوري  چي  هلته  نه  واښه  سته  او  نه  د  وري  غوښي،  بلکي  يو  لوی  دېګ  او  يو  شمېر   لوی  لوښي  ايښودل  سوي  دي .

غوايی  چي  دا  دېګ  او  لوښي  وليدل  نو  و  تښتېد.  زمري  پسې  ور  ږغ  کړه : ” چيري  ځې؟  خوښه  دي  نه  ده  چي  زما  سره  کښېنې،  مجلس  وکړې  او  هغه  ډوډۍ  چي  ستا  د  پاره  مي  جوړه  کړې  ده  و  خورې”؟ 

غوايي  وويل : ”  کله  چي  مي  دغه  لوی  دېګ  او  لوښي  و  ليدل  و  پوهېدم  چي  په  دې   کي  د  وري  غوښي  نه  دي  پخې  سوي  بلکي  دا  د  غوايي  د  غوښو  د  پاره  جوړ  سوي  دي . زه  د  دې  د  پاره  نه  يم  را  غوښتل  سوئ  چي  د  زمري  سره  ډوډۍ  وخورم  بلکي  د  دې  د  پاره  راغوښتل  سوئ  يم  چي  زمری  زما  غوښي  وخوري” .  

 

ترتيب کوونکی :  عبدالعلي رسولزاده

منبع: www.pashto.se ، د ۲۰۱۷ کال د فبرورۍ لومړۍ نېټه

 د کاپي کولو په صورت کي د منبع او د بشپړ لينک زیاتول حتمي دي.

**************************************************

هيله: لطفا د ماشومانو لپاره په نکلونو او اشعار رالېږلو سره زموږ د دغې پروژې سره مرسته وکړئ. که غواړئ زموږ سره تماس ونيسئ نو پر دغه جمله کليک وکړئ.